Lluis de Turiellos

Y un poeta orixinal, que ye una categoría a parte que dexa güelga propia nel camín de les lletres, que yá ye abondo. (Munches gracies, Lluis)

viernes, 30 de marzo de 2012

ENSIN SOLIDARIDÁ (Entrada 200)


29 marzu, fuelga xeneral, y ellí taben como tolos díes, na mesma mesa, apuraos na mesma andecha. Yá los agüeyara dende lloñe y decatárame de que desendolcaben la so estaya al altu la lleva. Averéme a ellos col envís de que se-yos cayera la cara de vergoña; pero non, porfiaron en xugar a les cartes. Alderiqué-yos que la xente paraba nesi día y que dempués diba a haber una axuntanza pel centru la ciudá, poro aneciaron cola partida. Amesté que caleyaba un piquete pela redolada y qu'igual los afalagaba, sicasí siguieron talamente. Colé del parque ablucáu pola poca solidaridá qu’amuesen dalgunos.

viernes, 23 de marzo de 2012

¿Ya el neno?



La Voz de Asturias (23.3.2012)
Telefónica ficha al marido de Soraya Sáenz de Santamaría
22/03/2012 14:20 / EUROPA PRESS / Madrid
Iván Rosa, abogado del Estado en excendencia y esposo de la vicepresidenta primera del Gobierno, Soraya Sáenz de Santamaría, se va a incorporar al departamento jurídico de Telefónica...

¡Coime!, ¿ya al neno, inda nun-y colocanon?
Amiguinos de la Voz: ¿Qué ye tar en “excendencia”?

jueves, 15 de marzo de 2012

FUTURU LLONXANU



La ministra Fomentu amosaba nel Senáu la programación dedicada a Asturies nel nuevu plan d'actuaciones del departamentu fasta 2024. Ensin entrar en plazos concretos, Ana Pastor perxura que rematará l'autovía del Cantábricu y la llegada a Asturies de l'alta velocidá ferroviaria. Sobre l'AVE, esclarió que los trenes nun solo van llegar a Uviéu y Xixón. La llinia va tener un ramal a Avilés.

“Para el 2024,
que taremos nel asilu,
llegará l’AVE a Avilés”

Una comedia teatru
pa caltenenos en vilu.
¡Tamos fartos de cuplés!

viernes, 9 de marzo de 2012

EL MIO ESTUDIU DE CAMPU




Los humanos y los goriles, más cerca xenéticamente. Un grupu d'investigadores descifren el xenoma del simiu, del qu'un 15% de les sos secuencies coinciden coles de la nuesa especie (La Voz d’Asturies, vienres 9 de marzu).

¡Coime!, ésto yá lu sabía yo fai una montonera d’años. Agora toi con un estudiu de campu, afitáu nel arume del metru de Madrid, p’amosar qu'hai xente que comparte’l 99% de la so carga xenética col gochu.

martes, 6 de marzo de 2012

La Casona Picarosu



Na fiesta de Picarosu,
al par baillen los paisanos,
dancen melandru y raposu
pelos bardiales cercanos.

Nel altor, la romería,
na vieyera, la paciencia,
y saber pasar el día,
como faen na residencia.
Nesti llugarín de cuentu,
asitiáu nesi cumal,
tol mundiu vive contentu
y naide s’alcuentra mal.

Ente viesques, praos y güertes
como nun los hai n’España,
ye un paraísu en ufiertes,
con imposible asonsaña.

Onde’l tiempu ta varáu,
enredando nesi altor,
columbrando tou Grau,
del cielu, nel corredor.

Allugáu nesa Casona,
a la vera los mayores,
a la escontra de la trona,
ente caleyos y flores.

Un saludo con estima
a esa talaya del norte,
de Castiella, pa esa cima,
Pindesierra, Villa y Corte.