Lluis de Turiellos

Y un poeta orixinal, que ye una categoría a parte que dexa güelga propia nel camín de les lletres, que yá ye abondo. (Munches gracies, Lluis)

martes, 29 de septiembre de 2015

Conozo...

(Semeya Prodecon)

     Conozo un paisanu que ye un exemplu de solidaridá: pide solidaridá pa esto, solidaridá p’aquello y, sobre too, solidaridá pa colo suyu. Entamó cola solidaridá cuando s’arruinara, enantes yera un empresariu afamáu, un gran castrón y amás nun daba un perru a naide.
     Conozo a xente rico qu'impón el xuegu del so rescate de la que-yos pinta mal, a traviés del so brazu políticu-facendosu-uniformáu, a los paganos. Los paganos yá nun son nin idólatres nin politeístes y nin siquier infieles sinón la mayoría pardiellos, que nunca reburdien, a los que se-ys fai pagar too.
     Conozo a una montonera xente qu’enxamás agabitara pa nada que-ys da por imponer  tamién la caridá y la caridá nun s'impón, porque’l verdaderu caritativu exerz la caridá y nun la manda exercer al so vecín.

     Conozo…

domingo, 27 de septiembre de 2015

¡María, calla ho!



¡María, calla ho!
Una asturianina,
cola llarimina,
teniéndolo too.
 
Nun yes quien a rir
y hasta los güeyinos
tienes coloradinos
de tantu sufrir.
 
Malditu carné,
qu'al nun aprobalu,
a les feries, por malu,
tenemos dir a pie.
 
¡Anda y calla ho!
Nun tienes crucines
más a recostines,
¡anda y calla, ho!
 
Pa la so sede fui l'agua,
pal so esfrecíu, candela,
y nel so cuerpu serrano
si-y  voi meter mano
riñe la so güela.
 
Querer como’l nuesu,
nun hai nel mundu dos.
Diómela con quesu
y empapicé con tos.
 
Serás la Leticia,
díxome a mi'l xaldu y yo lu creí,
pudo l’avaricia
y too tornaría por ser lo que fui.
 
¡Anda y calla ho!,
una asturianina,
cola llarimina,
teniéndolo too.
 
Nun yes quien a rir
y hasta los güeyinos
tienes coloradinos
de tantu sufrir.
 
Malditu carné,
qu’al nun aprobalu,
a les feries, por malu,
vamos siempre a pie.
 
Castigu de Dios,
namái rapacines fatines
lleven a recostines,
¡María, calla ho!

lunes, 21 de septiembre de 2015

VACACIONES EN LA PLAYA


     Hai nada qu’entamaben les vacaciones, ¿vós alcordáis?; agora, anden finando. El tiempu avanza; sicasí, les estaciones —güei, como ayeri de la qu’escribiera esto—, se repiten. La seronda yá ta equí. Que naide garre una depresión, nun paga la pena.

martes, 15 de septiembre de 2015

DESHONRA


Ye la España afitada nel sangrín,
de besties que torturen acaldía,
de feries y barbarie a sangre fría,
peles vegues que coren al cornín.

D’humana marabunda, l’espantín,
que-y afustia por miles na lloría,
nun ye quien a torgar esa elexía,
esfarrapáu’l probe yá a la fin.

La España qu’entá arroxa les mexelles
güei anecia de nuevu nel abusu,
la España que procura engarradielles

s'enferrona al martiriu qu'en desusu
 deshonra la conciencia en Tordesielles,
rutiando a la razón, el fieru obtusu.

domingo, 13 de septiembre de 2015

Coples del faltón faltosu


Siempres hai dalgún faltón
qu'ensin plizcu de respetu,
queriendo llevar razón,
anda espetando l’espetu.

Asina y en resultancia,
pasa tol tiempu enredando,
ayén a la tolerancia
y al par col so mazu dando.

Lu blancu diz que ye prietu,
lu prietu diz que ye blancu,
ye del repunante, netu,
ye torga, piesllu y atrancu.

Asoma pela to muria,
cuando aporta la contraria
y, guapamente, la lluria,
ye mosca ensucha y mamaria.

Davezu son radicales,
a les clares, estremistes,
igual-ys da lu que fales,
nin qu’aporfies nin qu’insistes.

Nin que digas so nin arre,
sé que-ys falta un fervor,
afáyense nel amarre,
retoliquen de mugor.

Entós, nun paga la pena,
aldericar al faltosu,
yá tien abonda condena,
¡qué-y coma l’alma l’osu!








martes, 8 de septiembre de 2015

Sombra


La castellana, recién, enantes de que s'evapore'l salitre...

Entre la luz de las velas
se oculta la sombra prieta,
cirios, lágrimas, candelas,
de cera, la muerte reta.

Acento pone la luna
y diéresis, las estrellas,
la bruma cruza oportuna,
borra todo trazo de ellas.

La mar matiza de añil,
allí, lejos de las olas,
  procura el faro candil,
en tanto a la orilla rolas.

A bordo de tu velero,
que la madrugada anhela,
posa en la vela un lucero,
vela que la vela vela.

Luz y sombra, sombra y luz,
la marina y el océano,
  graba el agua en el talud
quiebros de sones lejanos.

Día y noche, noche y día,
vuela ajena la gaviota;
  si bien, resta la poesía,
la parca, la vida agota.



domingo, 6 de septiembre de 2015

L'Hotel del Amante



     Tal y como vos desplicaba na cabera entrada, cuntaba que de la que tornáremos d’Asturies díbamos a quedar en casa; sicasí, a la muyer se-y ocurrió de secute rentar un cuartu nun hotel de Calpe y tuvimos de colar darréu. Cuando llegamos y xubí con ella a la oncena planta too s’amosaba enforma afayadizu, magar que nun me decatara del nome del hotel fasta qu’entré nel escusáu: ¡Hotel del Amante!, ¡coimes! De resultes, quedé dalgo amusgáu y tuvi de salir pa la terraza col envís de cavilgar sobro’l casu. Dempués supi que nada tenía que ver cola muyer, sinón que yo trabucara’l nome por culpa de tar mediu tapáu’l cartelu. Asina que nun-y dixi nada y, enantes de xintar, baxamos a conocer la Villa montando nun tren que tenía ruedes y andaba pela carretera. El percorríu foi dafechu prestosu, anque vengo con un esguince nel costazu de tanto corresponder al saludu d’una montonera xente qu’abultábaseme que nun conocía. Amás, nel restorán pañé unes croquetes de quesu y, como taben esfrecíes, metíles nel microondes y por mor de que nun sabía como furrulaba-yos calecí sobre manera arroxando’l focicu, la parpayuela y fasta’l mesmu gargüelu. Foi’l casu qu’aína nos averamos al hospital onde me diagnosticaron quemadures al Cabrales de tercer grau. D’esta miente, alvertivos qu’entamo en tientes otra vegada nel Feisbuc, pero abondo fadiáu.