Desaniciu

     Lu que camentara’l mio fíu ye la pura verdá: magar que paez que vamos remaneciendo, siguimos afogando. La nuesa llingua amorrenta pol cafiante desapegu y dalgunos inda rin la llaceria. La nuesa memoria aforfuga por culpa del afitáu desaniciu. Danme pena los que refuguen el so raigañu. Prodúcenme rocea los qu’entá bastien a la escontra. Aporfia’l dolimientu y naguo por alitar: sicasí, la murnia rinde a cualesquier pueblu que somorguia na tristura y la perda d’identidá y, de resultes, compadezo de mio mesmu.

El Tunelón, capítulu milésimu

     España tien medios p’acabar aína les obres, asina como les de l’autovía a La Espina. Lu que nun hai ye voluntá de les diverses alministraciones pa finar d'una puñetera vez estes llaceries.



Esto nun hai quien lu aguante,

remataron Panamá

y nun finen la Variante,

ansí qu’asina nos va.

Hai dineru pa tol mundiu,

pero non pa los de casa,

ye enguedeyu, tracamundiu,

en Asturies nada pasa.

A nós nos tomen el pelu,

porque nunca reburdiamos,

cuerren un tupíu velu

y mientes nos amarramos.

Dicíamos ayeri...

Yá contáramos un día,

el cuentu de la Variante,

que se caltién ensin vía

y enxamás tuvo a l’aguante.

Dicen qu’acaben tal añu

y al llegar la data, ¡diola!

nun fora más qu’un engañu,

una aporfiante trola.

Agora toquen les duldes,

tres metedures de pata,

mañana van ser les buldes,

pasáu, que parió la gata.

Del furacu la vergoña,

de la que falen del ramu,

abúltase que, de coña,

cola coña del entamu.

Yá ye’l Túnel de la Risa,

onde hubiera filtriaciones,

onde esbaria la cornisa

y trabuquen de coyo…

Naide ehí ye responsable,

si nun s’igua, se retrasa.

Va a ser oficial el bable

y van siguir cola guasa.

Equí nunca pasa nada,

nin qu’amburen toa Asturies.

A cantar una tonada

y a escaecer les penuries.

La Variante de Pichote

ye un asuntu delicáu,

se tramita too de cote,

magar que too retardáu.

Finó’l capítulu oncenu,

del Cuentu de la Variante,

qu’anició nel Pleistocenu,

cuando la Comedia’l Dante.



L'asturianu

Tercer cabudañu y, como siempres, paez que foi ayeri…

Cola mio pinta asturianu,

de tinetense o cangués,

voi pel mundiu tan ufanu,

¿dime tu cómo lu ves?

Colos los güeyos bien abiertos,

con aire de suañador,

como los esculibiertos,

suaño pente’l so verdor.

De paisanu teo manes

y anque nun soi un manguán,

m’arrodien siempre manguanes,

unos vienen ya otros van.

Cuenta cuentos la mio boca,

el versu teo a l’algame,

anque vivo na carueca,

nunca me quedé con fame.

Cola cara d’asturianu,

y l'aspeutu de llariegu,

vivo nun llugar llonxanu

y la patria nun la niego.

Cola mio pelleya d’ante,

col mio xeitu de prudente,

más qu’amante fui inorante,

fui xente de tala miente.

Col mio corazón valtando,

estremo l’especialista,

con procuru y arremangu,

nunca me perdió una llista.

Nun pudi guardar la calma,

si alcordances nel estoriu,

con un pase pa mio alma,

que refuga'l purgatoriu.

Con mi cara d’asturianu,

d'inocente y d’infeliz,

papo de vexetarianu,

voi refugando l’esliz.

Agua de la fonte, xana,

nueva que nun voi beber,

por vieyu neña galana,

porque manda la muyer.

Voi siguir siendo un rapaz,

malapenes, suañador,

tengamos la fiesta en paz,

nuna eternidá d’amor.

Y vamos facer caldía,

un versu o pimpirulada,

t’ufierto la poesía,

a cambéu nun pido nada.

Y vamos facer caldía,

de la vida, poesía.

Les 22.22

Les 22.22,

nun ye hora, son coríos,

que pasen de dos en dos,

los calores y los fríos.

La meyor hora de Rosa,

una hora meridianu,

la hora na que reposa

esi númberu cercanu.

A min, m’abulta d’ensalmu,

arte de maxa, ritual,

el tiempu se torna calmu

y paez qu’alita’l mal.

Ye verdá, s’abre’l camín,

siempres nel momentu exautu,

que crucio con Alvarín,

de la que se detién l’autu.

Aporfia amodo’l reló,

el reló de la parada,

cuando l’uno s’escondió

y el trés aporta llegada.

Asina, nueche tres nueche,

el tiempu paez qu’enfota, 

frena col caberu coche,

como’l día la marmota.

Arriendes, de tala miente,

si te topes nesa hora,

el mio versu ta presente,

suaña si te peta agora.

El nuesu PIB

Por si daquién nun sabe lu que ye’l PIB, quixera esclarar que ye’l Productu Interior Brutu d’un país y el d’España seique ye aínda más brutu qu'en nengún llau, yá que lo que producimos lo presten los políticos de toa triba a quien nun lo torna y lo que nós pidimos a l’Alemaña o a Europa lo tenemos que devolver fasta l'últimu perru. El casu ye qu’entá-ys pagamos a los qu’alministren la fechoría y esto nun tien pinta de camudar con naide. Arriendes, cuando nos dan daqué, namái que ye aire; abúltaseme que será pa finar d’aventanos a tolos d’equí. D’otra miente, nos encomienden retayar aínda más pa poder siguir regalando los nuesos cuartos.

Solemne

http://www.authorstream.com/Presentation/yciar-2488714-poemes-sua-os-de-pin-sierra/

     Préstanme sobre manera dellos videos que colinguen dalgunos poetes, magar que falen como siempres de la mar del calamar, de la lluna, les estrelles y de la moza de la boca miruéndanu. Abluco por como reciten solemnes y alcuérdome de cuando m’apunté a un cursu d’informática onde namás deprendíes: temes d’oficina, celdes, columnes y daqué asemeyáu. Por culpa d’ello, tuvi de marchar alloriáu, ensin saber iguar videos d’esa triba. Si dalguna vez garro como los componer, voi aportavos bien d’ellos y pueque vos recite daqué con voz solemne sinón escoyono enantes. Si nun soi quien a ello, quiciabes vos asitie los mios versos en celdes y les estrofes arrequexaes en columnes col envís de qu’escoyonéis vós.

     Nun voi escaecer dicivos qu’esta presentación tan afayadiza me la compunxera Ycíar, una amiga con muncha sensibilidá qu’aguapa lu que toca. 

El pinar

     Cuando yo yera mozu, yera más nuevu qu’agora y, de la que yera guah.e, aínda más nuevu que cuando yera mozu. Fecha l’alvertencia, amestar qu’enxamás m’alcordara siendo rapacín de nada de cuando yera mozu y, por embargu, sí a la escontra. Les alcordances son caprichoses, pero siempres caltienen una llinde ya enxamás aporten al aviesu. Güei, ensin saber la razón, m’alcordé d’aquel pinar qu’ente sapaes empatonaba de neñín a la vera la mio ma. Aquella viesca pinos yera pa min un enguedeyu, un llaberintu, cuasi qu’un camín aniciáticu. Amosaba rectes, curves, places, xubíes, derribadorios y, a lo caberu, un final; sicasí, aquel final yera l’entamu pa les xentes qu’entraben pel otru llau. ¡Nun lu escaecer!

Identidá

     “Los invasores, seres estraños d'un planeta que s’escastia. Destín: la Tierra. Propósitu: apoderase d’ella…” Asina entamaba una serie de ciencia ficción emitía nos años 60 del pasáu sieglu. Daquella, a los invasores había que los refugar. ¿Qué pasaría agora que camudara la perceición d’invasión? ¿Aceptaríamos qu'invadieran nuestro país otres xentes qu’a lo cabero tentaren apropiase de la nuesa tierra? ¿Almitiríamos que quixeran imponer los sos vezos en perxuiciu de la nuesa cultura? ¿Dexaríamos que desaniciaran la nuesa propia identidá? Arriendes, ¿-ys pagaríamos amás por remanecer equí?

     Quiero dar les gracies públicamente a un afamáu escritor asturianista que fina de proponeme formar parte del xuráu d’escoyeta de trabayos nel próximo concursu n’homenax a Vilareyo. D’igual miente, aporfiar na sida pol mio refugu, que-y empobiné a traviés del priváu. Nun voi asoleyar el so nome por culpa de que tanto esti collaciu, como yo, preferimos aneciar na nuesa xera ensin mayores estridencies a la escontra de les imposiciones y porque, cuando nun comulgues colos estremos, t’endilguen estopa democráticamente a dreches y a manzorga; magar qu’aínda nos caltengamos argutos.

De folixa per Madrid

    

     En Madrid yá entamaron les fiestes de San Isidru y yá güel a verbena y a Rosquielles del Santu; magar qu’esti añu, polo que fiede’l sorrutu que vien del sur, paez que les rustiaron demasiao.

Galgu

Solombra perru,

canis canosu,

refugo’l verru,

tucu pal osu.

Nun torga l’aire,

lu lleva’l vientu,

fame de flaire,

namái llamentu.

Magar galguiando,

bala balera,

acelerando

pela fastera.

N’agua nun mueya,

de la qu’orbaya,

vese la oreya,

la murnia calla.

Galgu de raza,

como la Güestia,

tres de la caza,

lu aforca’l bestia.

Too corazón,

na so coraza,

xeitu y razón,

nunca amarraza.

Güeyos d’amor,

nun arma bulla,

xinta y gafor

de faraguya.

Can aguzáu,

ye too ciñu,

siempres calláu

y enxamás iñu.

Más qu’un amigu,

como un hermanu,

ensin respigu,

me quier, ufanu. 

ASTURIES PARANICHU TERMINAL

     A la fin, bones noticies p’Asturies. Nos próximos años, la nuesa rexón va canalizar y recibir tolos viaxes del IMSERSO. ¡Cómo lo oís! Equí en Madrid, al tar asitiaos tolos ministerios, s'entera un de too. Paez ser que van construyir un mega balneariu en Boinás pa que tolos vieyos del país tomen les agües na so balsa. Un verdaderu lluxu, bañase nuna agua mineral como nun l'hai n’otru llugar. Arriendes, van llevantar el parador más grande d’España n’Avilés, na mesma vera d’Arcelor, nesti casu pa tomar los aires, con planta incineradora amestada y depósitu de borrafes direutu en La Carriona. Abúltase que pal 2025 va desaniciase’l problema les pensiones y vamos poder siguir perdonando les deldes a tol mundiu mundial. Lu peor de la cuestión ye que se tarrez que llueu venga la rancia de Merkel, pero non cola rebaxa.

     Amás, escaecí dicivos otra bona novedá, ye que na Feria de Muestres de Xixón qu’entra van contratar una montonera enterradores de “Guardianes del Paranichu”, cola chapla y too.

 

Y entá se rin de nós

       Güei les cadenes de televisión aporfien en cacarexar que milenta chinos van dexar siete millones d’euros nes tuñes españoles. Mentanto, nes páxines interiores de dalgún diariu pue lleese de sutrullu qu’ayeri'l nuesu gobiernu perdonara ¡1.492 millones de los españoles! a Cuba, que dixebró d’España hai pocu más d’un sieglu. Esta ye la caridá impuesta que nos tan llantando unos y otros pa despachar a los de fuera, mientres equí hai cuasi que 5 millones de paraos, xente en práutiques que nun cobra, xornaes d’al rodio d’11 hores n'oficines que nun tienen puerta cai, xubilaos a los qu’espeten un copagu —cuando sestaferiaron aforrando una montonera d’años pa llibrar d’ello—, melecines que retiren del ámbitu de la Seguridá Social al empar qu’ensucha la caxa les pensiones y cientos de miles de nuevos que se ven obligaos a colar. Ye como si cada vegada hubiera más comenenciosos col envís de qu’España españe, al tiempu que nos caltienen distrayíos col fútbol y n’amarraces.

¡Disolviéronse les Cortes!

     ¡Disolviéronse les Cortes! La noticia escorrió güei como la pólvora. La policía científica anda bramente apurada en alcontrar restos de senadores y congresistes peles cais de Madrid, asina como dalgún rastru del material disolvente emplegao. El Parlamentu Européu s'alcuentra dafechu alloriáu nun vaya esporpollar España de manera desaxerada.

Al son de la escavadora

 



Al son de la escavadora,

recostáu nun puercu bancu,

esfruté per media hora

de la bulla y del atrancu.

 

Del fumu los autobuses,

del riñir de conductores,

del afogar de les muses

golifando colectores.

 

D’un perru con cagalera,

d’un indiu qu’en bicicleta

circulaba pela acera

y a pocu me fai panceta.

 

Del reclamu d’un modernu,

tostón al altu la lleva,

que va llevando mal ternu,

pa ver si lliga una nueva.

 

El camión de la basura

contribúi col so arume,

un arume de frescura,

qu’a aquelli que güel, lu sume.

 

Una manifestación

crucia pela Castellana,

pasa zumbando un avión,

dos bandes monten xarana.

 

¡Viva’l Primeru de Mayu!,

glayen con un altavoz,

¡el mio xefe ye un mazcayu!,

¡viva’l martiellu y la foz!

 

Hai voladores que tiren,

mientres se sienten sirenes,

nun camión, barques retiren,

ensorden fasta les penes.

 

Anecia la escavadora,

a pesar ser día santu,

esfruté la media hora

y escapo llenu d’espantu.