Lluis de Turiellos

Y un poeta orixinal, que ye una categoría a parte que dexa güelga propia nel camín de les lletres, que yá ye abondo. (Munches gracies, Lluis)

lunes, 6 de marzo de 2017

El tranvía


     Al mio pá que tuviera que colar de L.lugarnes (Sierra) por nun ser meirazu, que foi inspeutor de tranvíes en Madrid y que tuvo un fíu que llantaba chaples na vía pa qu’achaplaren.

Tantán de tantarantán,
 tantarantán del tranvía,
tracalexa tarambán,
tracamundiando la vía.

Salióse’l trole del cable,
del cable salióse’l trole,
saliérase que ye en bable,
que nos lu van dar nel cole.

El conductor pisa’l frenu,
un frenu que ye de barra,
cuando ta’l tranvía llenu
y tol mundiu va de farra.

Mecen los mozos y moces,
tola mocedá pal pisu,
la mocedá dando voces,
l’inspeutor nun diera avisu.

Ellí sal el guardaguyes
cola cachaba de fierro,
por saber que fai, tu pruyes,
la estopa entemez col cerru.

Nel carril punxera un neñu,
punxera un neñu una chapla,
magar corriera bisueñu,
qu'a pocu arrinca-y la ñapla.

Ye pal cabu de la cuerda,
ye pa la punta’l cordel,
del peón naide s’acuerda,
anque entá lu bailla él.

El tranvía calca y cola,
hai un guah.e nel estribu,
que tantarantea, diola,
pero aínda sigue vivu.

Al son del tantarantán,
al son del tantaranteru,
los vieyos vienen y van,
ya asina aforren dineru.

No hay comentarios:

Publicar un comentario