Lluis de Turiellos

Y un poeta orixinal, que ye una categoría a parte que dexa güelga propia nel camín de les lletres, que yá ye abondo. (Munches gracies, Lluis)

martes, 21 de noviembre de 2017

Ente conflictos


Teo l’alma ente conflictos,
pente conflictos la mio alma,
a veces pierdo la calma
ya otres gano veredictos.

Decatéme pol cartelu,
que colinga d’una espita
na mesma muria de Lita,
y m’afitó’l desconsuelu.

Cuento que ye d’Arxentina,
lu asoleyó l’otru día,
güei encoplo esta poesía,
ensin querer meter pina.

Ye qu’agora s’amarraron
la mio alma col mio ego,
siendo yo abondo zuniego,
vaya cuestión que m’armaron.

El problema ye abegosu,
voi precisar de l’astucia,
magar que nun tea agucia,
amestando bien de posu.

Ye qu’a cuenta la engarrada
valto per una polea
nes mios nueches de velea,
pos nun dexen meter baza.

Allorio pol mio maxín
y nun soi a discurrir;
si daquién sabe salir,
que m’apurra otru pasquín

instruyendo la ocurrencia,
qu’enfotaron alma y ego,
y bien de golpes me pego,
entá ingresáu d’urxencia.

No hay comentarios:

Publicar un comentario